//నాలో రాగం నాకే తెలుసు//
మొన్నటి నిశీధి రేఖల్లో వెతుక్కున్న
నెలవంకలు నేడు చంద్రకిరణాలుగా మారి
రేయిని హాయిగా మార్చినప్పుడు
ఎదురు చూడకుండానే కురుస్తున్న వెన్నెలను అడగాలనుకున్నా
చడీ చప్పుడూ లేకుండా
అంతాహ్లాదంగా ఎలా జారుతావని..
వేలరంగుల సీతాకోకలొక్కసరి ఎగిరినట్లు
మనోవీధిలో భావాలు అల్లిబిల్లిగా
సందడి చేస్తున్నందుకు
అక్కడంతా మనసు పరిమళమిప్పుడు
పూలగంథాలకోసం తడుముకోనప్పుడు
బుగ్గలూరి నన్నుక్కిరిబిక్కిరి చేసిన
ఆనందానికి పరవశమని పేరందుకేనేమో
నే లయమవుతున్న లోకంలో
ఉలికదలికల ఊహల్లో
నాలో రాగాలు నాకే తెలుసు
అందుకే ఇప్పుడో స్వాతిశయాన్ని పాడుకుంటున్నా
మరో వేకువను మెత్తగా హత్తుకొనేందుకు..!!
No comments:
Post a Comment