గోదావరి పత్రిక

నాకు తెలిసిన నాన్న..

నాన్నందుకే వెనుకబడ్డాడు..
క్రమశిక్షణ పేరుతో క్రమం తప్పక
బిడ్డల్ని అదిలించి దూరం పెట్టాడు

నవమాసాలు మోసేందుకు కారణమై కూడా
అవకాశమున్నప్పుడల్లా.. వారిని సరిగా పెంచలేదని
ఆమెనొక్కదాన్నే దోషిని చేసి అవమానించాడు

కష్టపడేది కుటుంబం కోసమంటూనే
రోజువారీ ఖర్చులకి పద్దులు రాసి
పదిసార్లు పొలమారేలా కన్నీళ్ళు రప్పించాడు

ఇద్దరూ సమానమంటూనే ఆపిల్లని
కొంచం తక్కువ సమానంగా చూసాడు
'ఆడకూతురే'గానని కలల్ని విరిచాడు

ఎప్పుడూ నవ్వుతూంటే నగుబాటు తప్పదని
పెద్దరికం మాటున సున్నితత్వాన్ని దాచేసి
అనంతమైన దుఃఖాన్ని అలవాటు చేసాడు

అవును..వెనుకబడ్డాడు..
అమ్మని తన సగమని భావించని నాన్న వెనుకే ఉన్నాడు
ఆమె అడుగులకి హద్దుగీస్తూ నిలబడిపోయాడు

తనూ ఓ నాన్నకి కొడుకునని మరిచిన నాన్న
తానూ గరుకు కవచాన్ని ధరించి
కురచయ్యానని గాయపడ్డాడు

అయినా పిచ్చిగానీ..
ఆయన ఎక్కడ ఎప్పుడు వెనకబడ్డాడు..ప్రతి తరంలోనూ..
ఎప్పుడూ ముందే..వెనక్కు తగ్గనంత ఎత్తుగా ఉన్నాడు..
కుటుంబ శ్రేయస్సే ఆయన ఆరాటమైతే
ఆ పోరాటంలో వ్యక్తిత్వం కోల్పోతున్న పిల్లలెందరో
అందుకే..తల్లిదండ్రుల ప్రేమను ప్రోత్సాహాన్ని సమంగా అందుకున్నవారే జీవితంలో విజేతలెప్పటికీ !!