ఉషోదయ వెలుగు

వేకువ సడి..#

నులివెచ్చని వేకువసడిలో
మిణుకుమన్న తొలికిరణపు రెక్కలో
మంచు కురుస్తున్న మట్టివాసన
అనంత ప్రవాహమై
మదిలో తుళ్ళింతలు రేపుతుంది

కుసుమించు సుమాల తీపి రాగాలాపనలో
నీలిచెట్టు సుస్వర కొమ్మలసందుల్లో
ఝుమ్మని చెవులకి సోకిన సంకీర్తన
పిల్లగాలి కబురై
దివ్యసంచారానికి తీసుకుపోతుంది

గుండె మావితోట గుభాళింపులో
అల్లనల్లన అనుభవమవుతున్న ఆహ్లాదంలో
పెదవి పలుకుతున్న పదాల నర్తన
చిలిపికన్నుల నవ్వై
మోయలేని హాయిని పంచుతుంది

మాఘమాసపు వేకువెంత వెచ్చనో
మంచుబిందువులు తేనెచుక్కలైన తీపిలో
ఆనందం కోసం దోసిలి పడితే
ఆకాశమే దిగివచ్చి అరచేతిలో వాలింది..😊